သားမွေးကာလစီမံခြင်း

MDEP • MDEP • 12/01/2021

နွားမများသားစပ်မည့်အချိန်ကို ထိန်းချုပ်စီမံခြင်းအားဖြင့် နွားမများ သားမွေးမည့်ရက်ကို ထိန်းချုပ်စီမံနိုင်မှာ ဖြစ်ပါတယ်။ နွားမများသည် သားစပ်ပြီးနောက် ၉ လ (၂၈၃ ရက်) ခန့်တွင် နွားကလေးမွေးပါတယ်။ တစ်နည်းအားဖြင့် ဒါဟာ ကျွန်ုပ်တို့ခြံတွင် နို့ထွက်နှုန်းအမြင့်ဆုံးရမည့်အချိန်နှင့် နွားမများကို နို့နားမည့်အချိန် စသည်တို့ကို ထိန်းချုပ်နိုင်မည်ပင်ဖြစ်သည်။

တစ်ခါတစ်လေ ခြံသမားများတွင် ၎င်းတို့နွားများ နွားကလေးမွေးမည့်အချိန်ကို စီစဉ်မထားတတ်ကြပါဘူး။ နွားမများမြိုင်လာတာတွေ့လျှင် သားတင်ပေးလိုက်သည်။ သို့ပေမယ့် အချို့ခြံသမားများအတွက် ခြံရှိနွားအုပ်တစ်ခုလုံး၏ နွားကလေးမွေးမည့်အချိန်ကို ကြိုးစားပြီး ညှိယူလိုက်ခြင်းသည် အကျိုးကျေးဇူးကြီးကြီးမားမား ဖြစ်စေနိုင်ပါတယ်။ တစ်နှစ်ပတ်လုံး နို့ပမာဏတစ်သတ်မတ်တည်းရဖို့အတွက် နွားအုပ်၏ သားစပ်ချိန်ကိုညှိရတာက နည်းစနစ်ကျကျ စီမံမှုတစ်ခုဖြစ်ပါတယ်။ တစ်နည်းအားဖြင့် တည်ငြိမ်သည့် ဝင်ငွေရရှိနိုင်မှာ ဖြစ်ပါတယ်။ အစီအစဉ်အတိုင်း စနစ်တကျစီမံသွားမည်ဆိုပါက တခြားနွားတွေ နို့နားမည့်အချိန်၊ နို့ပေးကာလနောက်ပိုင်းရောက်ချိန်တို့ကို သိနိုင်မှာဖြစ်ပြီး အပြောင်းအလဲသိပ်မရှိသည့် နို့ပမာဏရရှိစေဖို့ မှန်ကန်တဲ့အချိန်မှာ မှန်ကန်စွာသားစပ်ရမည်ကိုလည်း သိနိုင်ပါတယ်။ ဒါဟာ စျေးကွက် သို့မဟုတ် နို့ရရှိဖို့အတွက် ပိုမိုလွယ်ကူလာစေမှာ ဖြစ်ပါတယ်။

ဥပမာ အရွယ်ရောက်ပြီးနွား ၂၄ ကောင်ရှိလျှင် လတိုင်း နွားကလေး ၁ ကောင်ပတ်လည်ခန့် ရရှိနေရမည်။ ထိုသို့ပြုလုပ်ဖို့အတွက် နည်းလမ်းတစ်ခုကတော့ မတမ်းများ၏ ပထမသားစပ်ချိန်ကို ထိန်းချုပ်စီမံခြင်း ဖြစ်သည်။

မြန်မာနိုင်ငံ၏နေရာတော်တော်များများတွင် အချို့လများသည် အစာစိမ်းပေါများစွာရရှိနိုင်ပြီး အချို့လများသည် ရာသီဥတုကြောင့် အစာစိမ်းရရှိရန် ခက်ခဲသည်။ နေရာတိုင်းတွင် နွားစာရရှိနိုင်သည့် အကောင်းဆုံးအချိန်များ ကွာခြားမှုရှိသော်လည်း နေရာတိုင်းကတော့ ရာသီအလိုက် ဖြစ်နေပါတယ်။ နှစ်တစ်နှစ်၏ သေချာသည့်အချိန်တွင် ကျွန်ုပ်တို့၏နွားများကို အစာကောင်းကောင်းကို ပိုမိုစျေးသက်သာသာနှင့် လွယ်ကူစွာကျွေးနိုင်မည့် သဘောပင်ဖြစ်သည်။ နွားများ အစာအများဆုံးလိုအပ်သည့်အချိန်၊ နွားနို့အများဆုံးထုတ်ပေးနေသည့်အချိန်ဖြစ်သည့် နို့ပေးကာလအစောပိုင်းတွင် အစာများသည်ထက်များ‌များ ကျွေးချင်ကြသည်မှာ အသေအချာပင် ဖြစ်သည်။

နောက်ထပ်စနစ်တကျစီမံမှုတစ်ခုကတော့ တစ်နှစ်တာ၏ အစာစိမ်းအများဆုံးရရှိသည့် ကာလတွင် နွားအများစုကို နို့ပေးကာလအစောပိုင်းတွင် ရောက်ရှိနေစေရန် သားစပ်ချိန်ကို ညှိယူခြင်းဖြစ်သည်။ ဤနည်းဖြင့် နွားများကို စျေးသက်သာစွာဖြင့် အစာကောင်းကောင်းကျွေးနိုင်ပြီး နို့ပမာဏများများလည်းရရှိနိုင်မှာ ဖြစ်ပါတယ်။ အကယ်၍ တစ်နှစ်ပတ်လုံးတူညီသည့် နို့ပမာဏကိုရရှိဖို့ မလိုအပ်လျှင်၊ မြက်များများရရှိချိန်တွင် နို့စျေးလည်းကောင်းကောင်းရရှိလျှင် ဤစီမံမှုသည် သင့်တော်ပါသည်။ ထုတ်လုပ်မှု ကုန်ကျစရိတ်အနည်းဆုံးဖြင့် စုစုပေါင်းနို့ပမာဏကို ရရှိနိုင်မည့် နည်းလမ်းလည်း ဖြစ်သည်။

သို့ပေမယ့် တစ်ခါတစ်လေ နို့စျေးနှုန်းပြောင်းလဲခြင်း၊ တစ်ချို့အချိန်များတွင် နွားနို့ရောင်းရရန်ခက်ခဲခြင်းများလည်းရှိသည်။ ဤအခြေအနေမျိုးတွင် နွားမများ နွားကလေးမွေးမည့် အချိန်ကို နို့ရောင်းအားအများဆုံးကာလနှင့် ကိုက်ညီအောင် ပြုလုပ်ရပါမယ်။ အစာစိမ်းများများရရှိသည့်ကာလတွင် နွားကလေးမွေးမည့်အစား နို့စျေးနှုန်းမြင့်သည့်အချိန်တွင် နွားမများ၏ နို့ပေးကာလ အမြင့်ဆုံးအချိန်ဖြစ်နေအောင် ကြိုးစားရပါမယ်။ ဒါ့အပြင် နို့စျေးနှုန်းနည်းသည့်အချိန်တွင် နို့နားနွားမများ များနိုင်သမျှများများဖြစ်နေအောင် ကြိုးစားရပါမယ်။ ဤနည်းအားဖြင့် ကျွန်ုပ်တို့၏ နွားနို့များကို ပိုမိုလွယ်ကူစွာ ရောင်းချနိုင်မှာဖြစ်ပါတယ်။

ခြံရှိနွားအုပ်၏ နွားကလေးမွေးမည့်အချိန်ကို ပုံစံချစီမံခြင်းနှင့်ပတ်သက်ပြီး ကျွန်ုပ်တို့ ပြောခဲ့သည့် နည်းပျုဟာ ၃ ခုကတော့ -

နို့ရောင်းချရမှုပမာဏ တစ်သတ်မတ်တည်းရှိသူများအတွက် နွားကလေးမွေးမည့် အချိန်ပုံစံ
အစာစိမ်းပေါများစွာရရှိနိုင်သည့် ကာလအတွင်း နို့ထွက်နှုန်းအမြင့်ဆုံး ထုတ်လုပ်မှုအတွက် နွားကလေးမွေးမည့်အချိန်
နို့စျေးနှုန်းမြင့်သည့်ကာလအတွင်း နို့ထွက်နှုန်းအမြင့်ဆုံးထုတ်လုပ်မှုအတွက် နွားကလေးမွေးမည့်အချိန်

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန်မေတ္တာရပ်ခံအပ်ပါသည်။

ဦးမင်းမင်းလတ်

5 years ago

နို့စားနွားမွေးချင်ပါသည် မည်သည့်နွားမျိုးမွေးသင့်ပါသလဲ ကျေးဇူးပြု

ညီညီ

5 years ago

နွားမွေးမြူရေးကို လုပ်ကိုင်ကြသော နေရာအများစုသည် ကျေးလက်အစွန်အဖျားဒေသများဖြစ်ကြသည်။ဝေလံခေါင်သီသော စာကျက်မြေရှိသောနေရာများဖြစ်ခြင်းကြောင့် နို့ရောင်းဝယ်ဖောက်ကားဈေးကွက်မရှိသောနေရာများဟုဆိုပါမည်။မွေူမြူသော နွားအများစုမှာ နို့စားနွားများမဟုတ်ခြင်းကြောင့် နို့ထွက်ကောင်းသောနွားမျိုးစိတ်များမဟုတ်ကြပါ။စိုက်ပျိုးရေကို အခိုင်အမာ အခြေပြုလို့မရသော နေရာအများစုဖြစ်ခြင်းကြောင့် ခိုင်းစေရန်နှင့် သားဖောက်ရန်အဓိက ထားကြသည်။ ကောင်ရေများလာလေ ကြီးမားသောဝန်ထုပ်ဝန်ပိုးမှာ အစာစနစ်နှင့် ကျန်းမာရေးဖြစ်သည်။နွားမွေးမြူရေးသည် စားကျက်မြေ အလှည့်ပြောင်းပြုရန်နှင့် ဒေသအလိုက် မွေးမြူသားဖောက်စနစ်ချခြင်းလည်းကွဲပြားသည်။မိုးရာသီသည် အစာစိုမြက်နုမြက်ကောင်းပေါများသော အခါကာလဖြစ်သော်လည်း မွေးမြူအားပြုသောနေရာဒေသ၏ စားကျက်သည် နှစ်စဉ်မိုးရာသီတွင် ရေကြီးနှက်မြုတ်တတ်သော စားကျက်ပြင်ဖြစ်နေနိုင်သည်။မိုးနှောင်းဆောင်းအဝင်သည် စားကျက်ပြင်ကောင်းကို ရရှိပါသော်လည်း မိုးအခါတွင် နွားအတွက် အစာလိုအပ်ချက်ကို ဖြည့်တင်းရန် အခါရာသီ၏ ဖြည့်တင်းနိုင်စွမ်းထက်ပိုမို မွေးမြူရန်မဖြစ်နိုင်ပါ။ ထိုအခါ နွားကလေးမွေးမည်အချိန်ကာလသည် စားကျက်၏ အနေအထားကို မှီပြီး အကောင်းဆုံးအခြေနေကိုရွေးချယ်ကြရသည်။

မျိုးပွားခြင်း

ဆိတ်သားဖောက်ခြင်းနှင့် စပ်စာပြုလုပ်နည်းများ အပိုင်း (၁)

ဦးဇော်(dof)

မျိုးပွားခြင်း

စီးပွားဖြစ်ငုံးမွေးမြူလိုသူများအတွက် ငုံးသားဖောက်နည်း (၁)

ဦးဇော်(dof)

မျိုးပွားခြင်း

ငါးမြစ်ချင်း၊ ငါးကြင်းများအပါအဝင် မွေးမြူရေးငါးများ မျိုးပွားရန်အရွယ်ရောက်ရှိချိန်များ

Rio Amora

Content provider

MDEP

Myanmar Dairy Excellence Project (MDEP) စီမံကိန်းသည် နို့စားနွားမွေးမြူသူများ အကျိုးအမြတ် ပိုမိုရရှိရန်၊ ဘေးဥပါဒ်ကင်းရှင်းသည့် နို့နှင့်နို့ထွက်ပစ္စည်းများအားစားသုံးနိုင်ရန်၊ ရေရှည်တည်တံ့ပြီး ယှဉ်ပြိုင်နိုင်စွမ်းရှိသည့် နို့နှင့်နို့ထွက်ပစ္စည်းစျေးကွက်ပေါ်ပေါက်လာစေရန် ရည်ရွယ်၍ နယူးဇီလန်နိုင်ငံ အစိုးရနှင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ မွေးမြူရေးနှင့်ကုသရေးဦးစီးဌာနတို့ ပူးပေါင်းဆောင်ရွက်လုပ်ကိုင်ခြင်းဖြစ်သည်။ ၂၀၁၄ ခုနှစ်တွင် စီမံကိန်းစတင်ပြီး မြက်(၈)မျိုး၊ ပဲ(၁၃)မျိုး၊ နို့စားနွားမျိုးရည်ခဲချောင်း(၃)မျိုးနှင့် ခြံအသုံးအဆောင်ပစ္စည်းများအားတင်သွင်းခဲ့ပြီး စားကျက်ဖွံ့ဖြိုး ရေး၊ မျိုးမြှင့်တင်ရေးနှင့် မွေးမြူရေးစနစ်မြှင့်တင်ရေးတို့အတွက် ဆောင်ရွက်လျက်ရှိသည်။ စိုက်ပျိုးနည်း စနစ်များ၊ မြက်ချဉ်ဖက်ပြုလုပ်နည်းများ၊ နွားခြံစီမံခန့်ခွဲမှုနည်းပညာများ၊ နွားငယ်နှင့်မတမ်းပြုစုစောင့် ရှောက်ခြင်းနှင့် လိုအပ်သောအစာအာဟာရတွက်ချက်နည်းများ၊ မေထုန်မဲ့သားစပ်နည်းစနစ်များအား သင်တန်းပေးခြင်းနှင့် တောင်သူဆွေးနွေးပွဲများပြုလုပ်လျက်ရှိသည်။ စဉ့်ကိုင်မြို့တွင် နွားနို့ဓာတ်ခွဲခန်း တည်ထောင်ခဲ့ပြီး သန့်ရှင်းသောနွားနို့ ထုတ်လုပ်နိုင်ရေးအတွက် ဆောင်ရွက်လျက်ရှိသည်။ Green way နှင့်လည်း တွဲဖက်လုပ်ဆောင်လျက် ရှိသည်။