ပြည်တွင်းဝက်မွေးမြူရေးကဏ္ဍမှာ အစာစျေးနှုန်း ၊ ဝက်သားပေါက်စျေး မြင့်တက်နေပြီး ဝက်အရှင်ခြံဖမ်းစျေး ကျဆင်းနေတဲ့အတွက် ဝက်မွေးမြူရေးလုပ်ကိုင်သူတွေ တွက်ခြေမကိုက်ဘဲ ဖြစ်နေရတယ်လို့ သိရပါတယ်။

လက်ရှိမှာ ဝက်အစာစျေးနှုန်းက ဆက်တိုက်ဆိုသလို မြင့်တက်လာနေပြီး ယခု ဖေဖော်ဝါရီ ၈ ရက်နေ့ကဆိုရင်လည်း ကုမ္ပဏီထုတ် ဝက်အစာတောင့် တစ်အိတ်ကို အမျိုးအစားအလိုက် ၁၅၀၀ မှ ၂၅၀၀ ကျပ်လောက် ထပ်တက်လာတယ်လို့ သိရပါတယ်။

ကုမ္ပဏီထုတ် ဝက်စာစျေးနှုန်းက ယခင် 25 Kg  တစ်အိတ်ကို  ၃၀၀၀၀ ကျော်မှ ၄၀၀၀၀ ကျပ်ကျော်သာရှိခဲ့ပေမယ့် လက်ရှိမှာတော့ 25 Kg တစ်အိတ်ကို ၆၀၀၀၀ ကျပ်ကျော်မှ ၁ သိန်းကျပ်ကျော်အထိ စျေးရှိနေတာ ဖြစ်တယ်လို့ သိရပါတယ်။ 

" အစာစျေးက လတိုင်းလိုလို တက်လာတယ်။ ဝက်စျေးကတော့ ၂၀၀၀၀ ကနေ ပြန်ကျသွားတယ်။ အစာစျေးနဲ့ ဝက်သားပေါက်စျေးက မြင့်နေတော့ မကိုက်ပါဘူး ။ ၁၈၀၀၀ စျေးရောင်းရတောင်ရှုံးပါတယ်။ အစာစျေးတွေက ထက်ဝက်တွေကို တက်သွားတာ။ ဒီတော့ အရင်က ဝက်တစ်ကောင်ကို  အစာစရိတ်က ၃ သိန်း ၅၀၀၀၀ ကုန်ရင် အခု ၇ သိန်းကုန်မယ်။ အဲဒါအစာဖိုးပဲရှိသေးတယ်။ ဝက်သားပေါက်ဖိုး ၊ ဆေးဖိုး မပါသေးဘူး " လို့ ပဲခူးအရှေ့ခြမ်းရှိ  ဝက်မွေးမြူရေးလုပ်ကိုင်သူ ကိုစိုးနိုင်က ပြောပါတယ်။ 

လက်ရှိမှာ ဝက်သားပေါက်စျေးနှုန်းက ဝက်အသက် တစ်လသားအရွယ် ဝက်သားပေါက် တစ်ကောင်ကို ၃၅၀၀၀၀ ကျပ်မှ ၄၀၀၀၀၀ ကျပ်ရှိနေကြောင်း ယခင်ကမူ ဝက်သားပေါက်တစ်ကောင်ကို ၁၂၀၀၀၀ မှ ၁၆၀၀၀၀ ကျပ်လောက်သာ ရှိခဲ့တာ ဖြစ်တယ်လို့ သိရပါတယ်။

ဝက်ကြီး အရှင်ခြံဖမ်းစျေးကတော့ နေရာဒေသအပေါ်လိုက်ပြီး စျေးနှုန်းကွာဟမှုရှိနေရာ  တစ်ပိဿာကို ၁၂၀၀၀ မှ ၁၇၀၀၀ ကျပ်အထိသာ စျေးပေးဝယ်ယူမှု ရှိနေတာ ဖြစ်တယ်လို့ သိရပါတယ်။ 

" ဝက်မွေးရတာ မဟန်ဘူး။ အနည်းဆုံး ၁၀ ကောင်လောက်မွေးမှ ရောင်းရတာ အဆင်ပြေတယ်။ အဲဒီအောက်မွေးရင် ပွဲစားတွေက စျေးနှိမ်ချင်ကြတယ်။ အခုမွေးသာထားတာ တွက်ကြည့်ရင် မကိုက်ဘူး ။ ၂၀၀၀၀ စျေးကျော်မှ အမြတ်ရနိုင်မယ်။ အခုက ဝက်ကြီးကို  ကားတစ်စီး စား ရောင်းနိုင်မှ တစ်ပိဿာကို ၁၅၀၀၀ စျေးပဲ ရတယ် ။ ဒီတသုတ်ပြီးရင် နားအုံးမယ် မမွေးသေးဘူး " လို့ နေပြည်တော်မှ ဝက်မွေးမြူရေး လုပ်ကိုင်သူ ကိုဝင်းက ပြောပါတယ်။

ဝက်သားပေါက် တစ်လသားအရွယ်ကနေ ရောင်းတန်းဝင် ဝက်ကြီးအရွယ် ရောက်သည်အထိဆိုရင် အချိန်ကာလ ၄ လမှ ၅ လဝန်းကျင် မွေးမြူရတာ ဖြစ်ကြောင်း မွေးမြူစဥ်အတွင်း  ဝက်အသေအပျောက် မရှိဘဲ ဝက်ကြီးထွားနှုန်း ကောင်းပြီး တစ်ကောင်ကို ပိဿာချိန် ၆၀ လောက်ရှိကာ ခြံဖမ်းစျေးကလည်း တစ်ပိဿာကို ၂၀၀၀၀ အထက်ကျော်မှသာ မွေးမြူရေးလုပ်ကိုင်သူတွေ အဆင်ပြေနိုင်မှာ ဖြစ်တယ်လို့ သိရပါတယ်။

လက်ရှိမှာတော့ ဝက်ကြီး အရှင်ခြံဖမ်းစျေးက ကျနေပြီး အစာစျေးနဲ့ ဝက်သားပေါက်စျေးက မြင့်နေတဲ့ အတွက် တွက်ချေမကိုက်တာကြောင့် တနိုင်တပိုင် ဝက်မွေးမြူရေးလုပ်ကိုင်သူ နည်းနေတယ်လို့ သိရပါတယ်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။