စိုက်ပျိုးရေးလုပ်တာ တွက်ချက်မကိုက်လို့ ကာကီးကင်းဘဲကို စီးပွားဖြစ်မွေးမြူသူ များလာ

ပြည်တွင်းတွင် ဘဲမွေးမြူရေးလုပ်ငန်းကို တစ်ပိုင်တစ်နိုင်အပြင် စီးပွားဖြစ် မွေးမြူသူများလည်း များပြားလာကြောင်း ဘဲမွေးမြူရေး လုပ်ကိုင်သူများထံမှ သိရသည်။

လက်ရှိတွင် ဘဲမွေးမြူသူအများစု မွေးမြူနေသည့် ဘဲအမျိုးအစားမှာ ထိုင်းနိုင်ငံမှ မျိုးဥများဝယ်ယူ၍ ပြည်တွင်း၌ သားဖောက်သည့် ကာကီးကင်းဘဲ (Khaki Campbell Duck) အမျိုးအစား ဖြစ်သည်။ 

ယခုနောက်ပိုင်းတွင် အဆိုပါ ဘဲအမျိုးအစားကို အနည်းဆုံး အကောင်ရေ ၃၀၀ မှ ၅၀၀ အကြားနှင့် အများဆုံး အကောင်ရေ ၁,၀၀၀ မှ ၂,၀၀၀ အကြားအထိ စီးပွားဖြစ် တိုးချဲ့မွေးမြူလာကြခြင်းဖြစ်သည်။

"အခု စိုက်ပျိုးရေးလုပ်တဲ့သူတွေက မွေးမြူရေးဘက်ကို ကူးလာကြတာ။ ကျွန်တော်ဆိုရင်လည်း စပါးမစိုက်တော့ဘဲ ဘဲကောင်ရေ ၁,၀၀၀ မွေးထားပါတယ်။ အခုက ဒေသဘဲ သိပ်မမွေးကြတော့ဘူး။ ထိုင်းကနေဥယူပြီး ဒီမှာ သားဖောက်တဲ့မျိုးတွေကိုပဲ မွေးကြတာ။ သူက ဥထွက်နှုန်းကောင်းတယ်" ဟု ဧရာဝတီတိုင်းဒေသကြီးမှ ဘဲမွေးမြူရေးလုပ်ကိုင်သူတစ်ဦးက ပြောသည်။

ဘဲမွေးမြူရေးလုပ်ငန်းကို ဧရာဝတီတိုင်း၊ ပဲခူးတိုင်းနှင့် ရန်ကုန်တိုင်းတို့တွင် အများဆုံး လုပ်ကိုင်ကြသဖြင့် မွေးမြူရေးဈေးကွက်အတွင်း အရောင်းအဝယ် ပုံမှန်ရှိနေသည်။ မွေးမြူရေးအတွက် ဘဲဝယ်ယူရာတွင် အရွယ်ရောက်ပြီးသည့် ဘဲမဒန်းများထက် ဈေးနှုန်းသက်သာသော ဘဲသားပေါက်များကိုသာ ပိုမိုဝယ်ယူကြကြောင်း သိရသည်။

လက်ရှိတွင် ဘဲသားပေါက်တစ်ကောင်လျှင် ၃,၀၀၀ ကျပ်အထက် ဈေးပေါက်နေပြီး ဥဥတော့မည့် မဒန်းမတစ်ကောင်လျှင် ၁၈,၀၀၀ ကျပ်မှ ၂၀,၀၀၀ ကျပ်ဝန်းကျင်အထိ ဈေးရှိနေသည်။

"ဘဲသားပေါက်က ဈေးနည်းပေမဲ့ မဒန်းဖြစ်လာဖို့ အချိန်ယူပြီး သေချာဂရုစိုက် မွေးရပါတယ်။ ဥစမ်းနေတဲ့ မဒန်းကတော့ ဈေးမြင့်ပေမဲ့ ချက်ချင်းဥတော့မှာဖြစ်လို့ ငွေပေါ်တာ မြန်တယ်။ အဲဒါကြောင့် သေချာချင်တဲ့သူက မဒန်းဝယ်သလို၊ အရင်းအနှီး သက်သာချင်တဲ့သူက သားပေါက်ကို အဝယ်များပါတယ်" ဟု ရန်ကုန်တိုင်း၊ တိုက်ကြီးမြို့နယ်မှ ဘဲမွေးမြူရေးလုပ်ကိုင်သူတစ်ဦးက ရှင်းပြသည်။

ကာကီးကင်းဘဲမျိုးစိတ်မှာ ဥအများဆုံးဥနိုင်သည့် ဘဲမျိုးစိတ်အဖြစ် သတ်မှတ်ခံထားရပြီး ရောဂါဒဏ် ခံနိုင်ရည်ရှိသည့်အပြင် ရေကူးရန် ရေကန်မရှိသော်လည်း ကျန်းမာစွာ နေထိုင်နိုင်သည့် ဘဲအမျိုးအစားဖြစ်သည်။ 

လက်ရှိတွင် မွေးမြူရေးလုပ်ကိုင်သူများသည် ကာကီးကင်းဘဲကို ရောင်းချရာ၌ ပိဿာချိန်ဖြင့်မဟုတ်ဘဲ အကောင်အရွယ်အစားနှင့် သက်တမ်းအလိုက် ဈေးနှုန်းသတ်မှတ် ရောင်းဝယ်နေကြကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။