၂၀၂၅-၂၀၂၆ ဘဏ္ဍာနှစ်တွင် ပြည်ပသို့ ဆန်နှင့် ဆန်ကွဲ တင်ပို့မှုပမာဏ ၂.၇၄ သန်းအထိ တင်ပို့နိုင်ခဲ့ပြီး ပို့ကုန်ရငွေအဖြစ် အမေရိကန်ဒေါ်လာ ၈၆၁ သန်း ရရှိခဲ့ကြောင်း မြန်မာနိုင်ငံ ဆန်စပါးအသင်းချုပ် (MRF) ၏ စာရင်းများအရ သိရသည်။

၂၀၂၅-၂၀၂၆ ဘဏ္ဍာနှစ်အတွင်း ပြည်ပသို့ ဆန်နှင့် ဆန်ကွဲ တင်ပို့မှုသည် ၂၀၂၄-၂၀၂၅ ဘဏ္ဍာနှစ်ထက် တင်ပို့မှုပမာဏ ၂ သိန်းခွဲကျော် မြင့်တက်လာသော်လည်း၊ ပို့ကုန်ရငွေအပိုင်းတွင်မူ အမေရိကန်ဒေါ်လာ သန်း ၂၆၀ ကျော် လျော့ကျခဲ့ခြင်း ဖြစ်သည်။ နှိုင်းယှဉ်ချက်အရ ၂၀၂၄-၂၀၂၅ ဘဏ္ဍာနှစ်တွင် ဆန်နှင့် ဆန် ကွဲ တန်ချိန် ၂,၄၈၇,၃၉၁ တင်ပို့ခဲ့ပြီး အမေရိကန်ဒေါ်လာ ၁,၁၂၉ သန်းအထိ ရရှိခဲ့ဖူးသည်။

"ယခုနှစ် ပြည်ပဆန်ဈေးကွက် မကောင်းတော့ ပို့ကုန်ရငွေပိုင်း လျော့သွားတဲ့သဘောပါ။ ဆန်နဲ့ ဆန်ကွဲ တင်ပို့မှုကတော့ မြင့်လာပေမဲ့ နိုင်ငံခြားငွေ ရရှိမှု လျော့နည်းသွားတော့ အားလုံး နစ်နာတာပေါ့။ နိုင်ငံတကာဈေး ကျဆင်းတော့ ပြည်တွင်းမှာလည်း ဈေးမြှင့်ဝယ်လို့ မရဘူး။ အဲဒီတော့ တောင်သူတွေ ဈေးကောင်းမရတဲ့ အခြေအနေမျိုး ဖြစ်သွားတာပါ" ဟု ဆန်လုပ်ငန်းရှင်တစ်ဦးက ပြောသည်။

အလားတူ ၂၀၂၅-၂၀၂၆ ဘဏ္ဍာနှစ်တွင် ပြည်ပသို့ ဆန်နှင့် ဆန်ကွဲ တန်ချိန် ၃ သန်းအထိ တင်ပို့နိုင်ရန် လျာထားခဲ့သော်လည်း လျာထားချက်ကို ပြည့်မီနိုင်ခြင်း မရှိခဲ့ပေ။

လစဉ် တင်ပို့မှုအခြေအနေအရ မေလတွင် တန်ချိန် ၂၅၉,၅၀၁ တင်ပို့ပြီး ဒေါ်လာ ၉၁ သန်း ရရှိခဲ့သည်။ နိုဝင်ဘာလတွင်လည်း တန်ချိန် ၂၆၃,၈၁၅ ကျော် (မေလထက် ပိုမိုတင်ပို့ခဲ့သော်လည်း) ဒေါ်လာ ၇၆ သန်းသာ ရရှိခဲ့သည်ကို တွေ့ရသည်။

"ပြီးခဲ့တဲ့နှစ် ဧပြီကနေ ဩဂုတ်လလောက်အထိ ပြည်ပဈေးကွက် ကောင်းခဲ့တယ်။ အဲဒီနောက်ပိုင်း ဈေးပြန်ကျလာတာ အခုထိပါပဲ။ မေလနဲ့ နိုဝင်ဘာလ တင်ပို့မှုကို ယှဉ်ကြည့်ရင် တန်ချိန်ချင်း တူသလောက်ရှိပေမဲ့ ရငွေမှာ ဒေါ်လာ ၁၅ သန်းလောက် ကွာဟနေတာ တွေ့ရတယ်" ဟု MRF အဖွဲ့ဝင် ဆန်လုပ်ငန်းရှင်တစ်ဦးက ဆိုသည်။

လက်ရှိ ပြည်တွင်းဈေးကွက်တွင် ပြည်ပတင်ပို့သည့် ဆန်အမျိုးအစားများမှာ ဈေးနှုန်းအတက်အကျ မရှိသလောက် ဖြစ်နေသော်လည်း၊ ပြည်တွင်းစားသုံးသည့် ဆန်အမျိုးအစားများမှာမူ တစ်အိတ်လျှင် (၂၄ ပြည်ဝင်) ကျပ် ၁၀,၀၀၀ မှ ၂၀,၀၀၀ ခန့်အထိ မြင့်တက်နေကြောင်း သိရသည်။

မစံပယ်(AMIA)

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။