၁. မိမိတို့၏ နေအိမ်အနီးအနားရှိ မြေလွတ်၊ မြေရိုင်းများတွင် ကောင်းမွန်သင့်တော်သော နေရာကိုရွေးချယ်ပါ။

၂. ငါးမွေးမြူသည့်နေရာသည် အခြားသီးနှံစိုက်ပျိုးသောနေရာ မဖြစ်ရန်သတိပြုပါ။

၃. ပြေပြစ်သော လျှောစောက်ရှိသော မြေမျိုးသည် ကောင်းမွန်ပါသည်။

၄. မြေအလွန်နိမ့်နေခြင်း နှင့် မိုးတွင်းကာလ ရေကျော်သော၊ ရေလွှမ်းသောနေရာမဖြစ်စေရပါ။

၅. တောင်ကုန်းပေါ်ရှိမြေနှင့် လှေခါးထစ်ကဲ့သို့သော မြေမျိုးမဖြစ်စေရပါ။

၆. မိမိရွေးချယ်ထားသော ငါးကန်မြေနေရာသည် သင်၏နေထိုင်ရာအိမ်နှင့် နီးစပ်မှုရှိရမည်။ သို့မှသာ မိမိငါးကန်ကို စောင့်ရှောက်နိုင်မည်။

ရေရရှိမှု

မိမိငါးမွေးကန်သည် ရေရရှိနိုင်သော၊ ရေသွယ်၍လွယ်ကူနိုင်သော မြစ်၊ချောင်းများ၊ ရေသွယ်မြောင်းများမှ တစ်နှစ်ပတ်လုံး ရေရရှိနိုင်ရမည့်အပြင်၊ ၎င်းနေရာများတွင် ရေပေါများစွာရှိသောနေရာ နှင့် နီးစပ်သောနေရာဖြစ်ရမည်။

- မိမိငါးကန် ရေလိုအပ်သောအချိန်တွင် ရေသွင်းနိုင်သောနေရာ ဖြစ်ရမည်။

- မိုးရေကို အသုံးပြုပြီး၊ ရေရရှိခြင်းဆောင်ရွက်မှု မဖြစ်စေရ၊ မိုးရေမရရှိသောအချိန်တွင် ငါးမွေးကန်အတွင်း ရေရရှိမှုနည်းပါးပြီး ငါးများသေဆုံးနိုင်သည်။

- ရေသွင်းယူခြင်းလွယ်ကူပြီး ကန်ရေပြန်ထုတ်သောအချိန်တွင်လည်း လွယ်ကူရမည်။

- ရေစစ်ကန် တူဖေါ်ပြီး ၎င်းရေစစ်ကန်မှ ရေကို ငါးကန်သို့ လွဲပြောင်းရယူခြင်းသည် အကောင်းဆုံးဖြစ်သည်။ သို့မှသာငါးရိုင်းများပါဝင်မှုမရှိသည့်အပြင် ရွှံ့နှစ်ရေများလည်းမပါဝင်နိုင်ပါ။

မြေအရည်အသွေးနှင့် မြေစမ်းသပ်ခြင်း

ငါးမွေးကန် တည်ဆောက်ရန်အတွက် မြေ၏အရည်အချင်းကို အောက်ပါအတိုင်း စမ်းသပ်ကြည့်ရှုရမည်။

အလွယ်ကူဆုံး (ပထမ) စမ်းသပ်ခြင်း

- မြေသားကိုလက်ဖြင့်ယူပြီး၊ ဆုပ်နယ်ခြင်း၊ ဖိနှိပ်ခြင်း နှင့် လောက်စာလုံးပုံစံ၊ ဘောလုံးငယ်ပုံစံပြုလုပ်ပါ။

- လောက်စာလုံးပုံစံ၊ ဘောလုံးပုံစံပြုလုပ်ထားသော မြေသားအလုံးကို အပေါ်သို့ပစ်တင်ပြီ၊ အောက်သို့အကျ တွင်ပြန်လည်ဖမ်းယူပါ။

- သဲမြေ၊ ဂဝံကျောက်မြေပါခဲ့လျှင် မြေသားတစ်ခုနှင့် တစ်ခု စီးကပ်မှုမရှိဘဲ၊ မြေသားဘောလုံးသည် ကွဲကျမွှာ သွားလိမ့်မည်။ ၎င်းမြေမျိုး မကောင်းပါ။

- လောက်စာလုံးပုံစံ၊ ဘောလုံးပုံစံမြေသားသည် ကွဲဖြာကျခြင်း မရှိဘဲ စည်းစည်းလုံးလုံး ရှိနေပါက ၎င်းမြေသား သည် ကောင်းမွန်ပါသည်။ ရွှံ့မြေပါဝင်မှု များသည်ဟု ပြောနိုင်ပါသည်။

သို့သော် ၎င်းမြေမျိုးကိုသုံးရန် သင့် မသင့်ကို ဒုတိယနည်းဖြင့် ပြန်လည်ဆန်းစစ်ရမည်။ အောက်ပါအတိုင်းဒုတိယနည်း ကိုစမ်းသပ်ပါ။

ငါးကန်တူးမည့် နေရာတွင် အကျယ် (၁) တောင် (၁၈လက်မ)၊ အနက် နှစ်တောင်ခွဲ (၃ပေ၉လက်မ) လူတစ်ယောက် ၏ ခါးအနက်ခန့် အနက်ကိုတူးဖေါ်ပါ။

မနက်ပိုင်း နေထွက်ချိန်တွင် တူးထားသော ကျင်းထဲသို့ ရေပြည့်အောင် ဖြည့်ပါ။ ညနေပိုင်းတွင် တွင်းထဲမှ ရေများသည် မြေကြီးထဲသို့စိမ့်ဝင်သွားလိမ့်မည်။

နောက်တစ်ကြိမ် တူးထားသောတွင်းထဲသို့ ရေပြည့်အောင်ထည့်ပါ။ တွင်းအပေါ်မှ တစ်ခုခုဖုံးအုပ်ထားပေးပါ။

နောက်တစ်နေ့ မနက်ပိုင်းတွင် တွင်းထဲတွင် ရေရှိနေလျှင် ၎င်းမြေမျိုးသည် ရေကိုလုံလောက်စွာစိမ်းသိမ်းနိုင်ကြောင်း သိနိုင်သည်။ ၎င်းနေရာတွင် ငါးကန်တူးဖေါ်နိုင်သည်။

မိသားစုတစ်ပိုင်တစ်နိုင်ကန်များတွင် ငါးမွေးမြူခြင်းနှင့် ကန်ဘောင်တွင် စိုက်ပျိုးခြင်းသင်တန်း လက်စွဲစာအုပ်မှ

MYCulture project

WorldFish-Myanmar