ငါးဖမ်းစက်လှေတွေ ပင်လယ်ပြင်ကို ထွက်မှုနည်းလို့ ငါးပိ၊ ငါးခြောက်များ ဈေးတက်

စက်သုံးဆီဈေးနှုန်းမြင့်တက်လာတဲ့ အခြေအနေကြောင့် ဧရာဝတီတိုင်းထဲက ငါးဖမ်းလုပ်ငန်း လုပ်ကိုင်သူတွေမှာ ပင်လယ်ပြင်ထွက်နိုင်မှု နည်းလာပြီး မျှင်ငပိထုတ်လုပ်တဲ့ မျှင် ရရှိမှု လျော့ကျလာတယ်လို့ ဧရာဝတီတိုင်းမှ ငပိငါးခြောက် ရောင်းဝယ်သူများထံမှ  သိရပါတယ်။ 

ပင်လယ်ပြင်ကို ငါးဖမ်းထွက်နိုင်တဲ့ စက်လှေအရေအတွက် နည်းလာသလို ရာသီဥတုအခြေအနေကြောင့် ပင်လယ်ပြင်မှာ မျှင်လည်းမတက်တာကြောင့် မျှင်ရရှိမှု အလွန်နည်းလာတဲ့အတွက် လတ်တလောမှာ မျှင်ငပိ ထုတ်လုပ်နိုင်မှု လျော့ကျလာပြီး ဈေးနှုန်းမြင့်လာတယ်လို့ ဆိုပါတယ်။

"ဆီဈေးရယ် ရာသီဥတုရယ်ကြောင့် လှေတွေလည်း ကောင်းကောင်းမဆင်းနိုင်လို့ ငါးတွေ မျှင်တွေ မရတာ အတော်ကြာပါပြီ။ အရောင်းအဝယ်တွေက အရင်လို မချောမွေ့တော့ဘူး။ မျှင်ငပိ နှစ်ထပ်ထောင်းဆိုရင် မရသေးပါဘူး။ ပင်လယ်မှာကို မျှင်လည်းမတက်ဘူး" လို့ ဧရာဝတီတိုင်းထဲက ငါးပိ၊ ငါးခြောက်၊ ပုဇွန်ခြောက်မျိုးစုံ လက်လီလက်ကား ရောင်းဝယ်ရေးလုပ်ကိုင်သူ တစ်ဦးက ပြောပါတယ်။

ဒါကြောင့် လက်ရှိမှာ မျှင်ငပိဈေးနှုန်းတွေလည်း မြင့်တက်လာပြီး ယခင်က မျှင်ငပိ လေးထပ်ထောင်း တစ်ပိဿာကို လက်လီဈေး ၃၅,၀၀၀ ကျပ်သာရှိရာကနေ လက်ရှိမှာ ၄၀,၀၀၀ ကျပ်နှုန်း ဖြစ်သွားတယ်လို့ သိရပါတယ်။ 

ဒါ့အပြင် စက်သုံးဆီဈေးနှုန်းမြင့်တက်မှု ဂယက်ကြောင့် ရေထွက်ကုန်ပစ္စည်း ထုတ်ကုန်တွေကို တင်ပို့ရာမှာလည်း သယ်ယူပို့ဆောင်ရေးစရိတ် မြင့်တက်လာသလို ဆီအခက်အခဲကြောင့် ကုန်ကားတချို့မှာ ခရီးဝေးမထွက်နိုင်ခြင်းစတဲ့ အခက်အခဲတွေ ရှိနေတယ်လို့ သိရပါတယ်။

"တန်ဆာခတွေ ဈေးကြီးတာရော၊ ဆီမရလို့ ကားမထွက်နိုင်တာတွေရော၊ ပို့နေကျမဟုတ်ရင် လက်မခံတာတွေရော အစုံပါပဲ။ မြို့တွင်း ဒလီခတွေလည်း ဈေးကြီးကုန်ပြီ။ လောလောဆယ်တော့ အဆင်ပြေသလို လုပ်နေရတယ်" လို့ ရေထွက်ကုန်ပစ္စည်း ရောင်းချသူတစ်ဦးက ပြောပါတယ်။

 ရေထွက်ကုန်ပစ္စည်း ရောင်းချသူတချို့ကတော့ မျှင်ငပိအပါအဝင် ရေထွက်ကုန်ပစ္စည်း ရောင်းချမှုကို လက်လီရောင်းချခြင်းအစား လက်ကားရောင်းချမှုပုံစံမျိုး ဖြစ်စေ၊ ဒေသအလိုက် ရောင်းချနိုင်မယ့် ဈေးဆိုင်၊ စတိုးဆိုင် စတဲ့ အရောင်းဆိုင်တွေမှာ ဖြန့်ဖြူးရောင်းချနိုင်ဖို့ စီစဉ်မှုရှိလာကြတယ်လို့ သိရပါတယ်။

ထို့ပြင် စက်သုံးဆီဈေးကြောင့် ငါးဖမ်းစက်လှေတွေ ပင်လယ်ပြင်ကို ထွက်ရှိမှုနည်းပြီး  ငါးပိ၊ ငါးခြောက်၊ ပုဇွန်ခြောက် စတဲ့ ရေထွက်ကုန်ပစ္စည်း ဈေးနှုန်းတွေလည်း မြင့်တက်နေတဲ့ အခြေအနေ ရှိတယ်လို့ သိရပါတယ်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။