ဖိုးလမင်းကျိုင်းသည် အစုံစားကျိုင်းကောင်ဖြစ်ပြီး တောင်သူများ၏စီးပွားရေးကို သိသာစွာ ထိခိုက်စေသော ဖျက်ပိုးဖြစ်ပါသည်။ သီးနှံအမျိုးမျိုးကို ကျရောက်နိုင်သဖြင့် အမြစ်ပြတ်နှိမ်နင်းရန် တော်တော်လေးခက်ခဲပါသည်။ ထို့ကြောင့် ဘက်စုံပိုးမွှားကာကွယ် နှိမ်နင်းနည်းဖြင့်သာ ကာကွယ်နိုင်ပါသည်။ 

ဖျက်ဆီးပုံလက္ခဏာများ

    အတွေ့ရများသောလက္ခဏာမှာ ပြောင်းဖူးအပင်ငယ်များပုသွားပြီး ညှိုးနွမ်းသွားကာ အရောင်ပျက်သွား သို့မဟုတ် သေသွားသည်။ ပြောင်းဖူးတန်းအချို့ရှိ အပင်များ မြေကြီးပေါ် ပေါ်မလာဘဲ ဖြစ်တတ်သည်။ ဖိုးလမင်းကျိုင်းများသည် အညွန့်လောင်းကိုစားပြီး ပြောင်းဖူးပင်ကို သေစေသည်။ ထိုလက္ခဏာတွေ့ရပါက ပြောင်းဖူးပင်အချို့ကို မြေတူးနုတ်ပစ်ပါ။ အမြစ်ဇုံနေရာတွင် ဖိုးလမင်းကျိုင်းကိုရှာကြည့်ပြီး အပင်ပေါက်များနှင့် အမြစ်ကို ထိခိုက်ဒဏ်ရာရှိမရှိစစ်ပါ။ 

ဖျက်ပိုး၏ဝိသေသလက္ခဏာ

    ဖိုးလမင်းကျိုင်းမျိုးစိတ် (၃) မျိုးရှိသည်။ ဂျပန်ဖိုးလမင်းကျိုင်း (Japanese beetle)၊ မေဇွန်ကျိုင်း (May/June Beetle) နှင့် ရုပ်ဖျက်ကျိုင်း (Masked Beetle) ဟူ၍ ဖြစ်သည်။ 

အရွက်ရောက်ကောင်

    ကျိုင်းကောင်များသည် (၁၂) မီလီမီတာမှ (၂၅) မီလာမီတာအထိ ရှည်သည်။ အရွယ်ရောက်ကောင်များသည် အဝါရောင်မှ နီညိုရင့်ရောင် သို့မဟုတ် အနက်ရောင် အထိရှိတတ်ပြီး တုတ်ခိုင်ပြီး ရှည်မျောမျောရှိကာ အရောင်တောက်သော ကျိုင်းကောင် များဖြစ်ကြသည်။ အချို့ကျိုင်းကောင်များက ပိုမိုအရောင်တောက်သည်။

လောက်ကောင်

    အရှည် (၂၀) မီလီမီတာမှ (၄၅) မီလီမီတာအထိရှိသည်။ လောက်ကောင်များသည် အင်္ဂလိပ်အက္ခရာ “C” ပုံသဏ္ဌာန်နှင့်အတူ အဖြူရောင်ကိုယ်ခန္ဓာ၊ အညိုရောင်ဦးခေါင်းနှင့် ခြေထောက်သုံးစုံရှိကြသည်။ ဝမ်းဗိုက်၏နောက်ပိုင်းသည် မြေကြီးအမှုန်များကြောင့် ပိုမိုအရောင်ရင့်သည်။ နောက်ဆုံးဝမ်းဗိုက်အဆစ်တွင် ထင်ရှားသည့်ဆူးချွန် (၂) တန်း ပါသည်။ 

ရုပ်ဖုံး

    အရှည် (၂၀) မီလီမီတာမှ (၂၄) မီလီမီတာအထိရှိသည်။ ရုပ်ဖုံးသည် အဖြူရောင်၊ အဝါဖျော့ သို့မဟုတ် ညိုရင့်ရောင်ရှိသည်။ 

ဥ

    အချင်းအားဖြင့် (၁.၅) မီလီမီတာ မှ (၃) မီလီမီတာအထိရှိပြီး မြေကြီးများနှင့်ဖုံးအုပ်ထားကာ တစ်လုံးတစ်ခဲတည်းရှိသည်။ ၎င်းတို့သည် သေးငယ်ပြီး စက်လုံးပုံရှိကြကာ အကောင်မပေါက်ခင် ပိုမိုအရောင်ရင့်လာသည်။

ကာကွယ်နှိမ်နင်းနည်းများ

(က) စိုက်ပျိုးနည်းဖြင့် ကာကွယ်နှိမ်နင်းနည်း

၁။ ထယ်ထိုး၊ ထွန်မွှေ၊ ပေါင်းပေါက်ပါ။

၂။ ရေလွှမ်းပါ။

၃။ ဆိုးဝါးစွာကျရောက်ပါက ဘာမှမစိုက်ဘဲ ပလှပ်ထားပါ။

၄။ ဆိုးဝါးစွာကျရောက်ပါက အာလ်ဖာဖာနှင့် ကလိုဗာအပင်များကို စိုက်ပါ။

၅။ ယခင်က မြက်ပင်ဖုံးလွှမ်းပေါက်ရောက်ခဲ့သောမြေမှာ အာလူးမစိုက်ပါနှင့်။

၆။ ပြောင်းဖူးခူးပြီးပါက မြေကိုထယ်ရေးနက်နက်ထိုးပါ။

(ခ) လက်အားဖြင့်ကာကွယ်နှိမ်နင်းနည်း

၁။ အကောင်ကြီးတွေ ပျံသန်းနေသောရာသီတွင် အလင်းရောင်ထောင်ချောက်ထွန်းခြင်းကို လူထုအခြေပြု စုပေါင်းလုပ်ဆောင်ပါ။ ဖမ်းမိသောကျိုင်းကောင်များကို ရေနံဆီတွင် နှစ်သတ်ပါ။

၂။ တမာကိုင်း သို့မဟုတ် ညောင်ကိုင်းများကို ပြောင်းဖူးခင်းထဲက နေရာအမျိုးမျိုးမှာ ချထားပါက ကျိုင်းကောင်များကို ဆွဲဆောင်နိုင်ပြီး ၎င်းအရွက်များကို စားမိပါက သေစေနိုင်သည်။ 

(ဂ) ဇီဝနည်းဖြင့်ကာကွယ်နှိမ်နင်းခြင်း

ဘီတီ (ဘက်စလပ်သူရင်ဂျနက်စစ်) ဇီဝမှိုသတ်ဆေးကို အသုံးပြုပါ။

(ဃ) ဓါတုနည်းဖြင့်ကာကွယ်နှိမ်နင်းခြင်း

၁။ စိုက်ပျိုးနည်းဖြင့် ကာကွယ်နှိမ်နိမ်း၍မရမှသာ ဓါတုနည်းဖြင့် ကာကွယ်နှိမ်နင်းပါ။

၂။ အောက်ပါပိုးသတ်ဆေးတစ်မျိုးမျိုးကို ဆေးဘူး/အိတ်ပါအညွှန်းစာအတိုင်း အသုံးပြုပါ။

• အင်မီဒါကလိုပရစ်ဒ် (Imidacloprid)
• သိုင်ယာမက်သိုဇမ် (Thiamethoxam)
• ကလိုရန်ထရန်နီလီပရိုးလ် (Chlorantraniliprole)
• ဘိုင်ဖန်သရင် (Bifenthrin)

ဒေါက်တာကိုကို၏စိုက်ပျိုးရေးဆောင်းပါးများလေ့လာရန်

ပြောင်းဖူးတွင်ကျရောက်တတ်သော ဖိုးလမင်းကျိုင်းကို ကာကွယ်နှိမ်နင်းခြင်းဆောင်းပါးကို KMSS အဖွဲ့က ကူညီပံ့ပိုးထားပါသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။