အစားအစာဆိုသည်မှာ လူသားတစ်ဦး၏ အသက်ရှင်သန်ရန် အဓိကလိုအပ်ချက်များထဲမှ အရေးအကြီးဆုံးအချက် တစ်ခုဖြစ်ပါသည်။ အစားအစာစားသုံးခြင်းမှရရှိသော အာဟာရဓာတ်များသည် နေ့စဉ်လုပ်ငန်းဆောင်တာများကို လုပ်ကိုင်နိုင် စေရန် ကျွန်ုပ်တို့အတွက်လိုအပ်သည့် စွမ်းအင်နှင့် အာဟာရကိုပေးစွမ်းပါသည်။ အစားအစာများသည် လူ့အဖွဲ့အစည်းအတွက် ကြီးမားသော အခန်းကဏ္ဍမှ ပါဝင်နေပြီး အာဟာရရှိကာ၊ ဘေးကင်းသော အစားအစာများကို စားသုံးခြင်းဖြင့် ပျော်ရွှင်ကျန်းမာသော နေ့ရက်တိုင်းကို ပိုင်ဆိုင်နိုင်မည် ဖြစ်ပါသည်။ လူတိုင်းသည် ဘေးကင်းသည့် အစားအစာများကို စားသုံးနိုင်ဖို့ အခွင့်အရေးရှိပါသည်။ ထို့အတူ လူတိုင်းသည်လည်း “အစားအစာ ဘေးကင်းလုံခြုံမှုဟာ ဘာကြောင့် အရေးကြီးသလဲ” ဆိုသည့် မေးခွန်းကို ဦးစားပေး စဉ်းစားသင့်ပါသည်။

နှစ်စဉ်ကမ္ဘာတစ်၀န်းရှိ သန်းနှင့်ချီသောလူများ (လူဆယ်ယောက်လျှင် တစ်ယောက်နှုန်း) သည် အစားအစာကြောင့် ဖြစ်သော ပြင်းထန်သည့်ရောဂါများကို ခံစားနေကြရပါသည်။ အစားအစာများ စားခြင်းမှ ဖြစ်ပေါ်လာသော ရောဂါများကြောင့် နိုင်ငံ၏ကုန်သွယ်ရေး၊ ခရီးသွားလာမှုလုပ်ငန်းများ၊ ပြည်တွင်းစီးပွားရေးလုပ်ငန်းများကို ထိခိုက်စေရုံ မျှမက နိုင်ငံတော်၏ ကျန်းမာရေးစောင့်ရှောက်မှုစရိတ်များထောင်းကာ၊ လူမှုစီးပွားဖွံ့ဖြိုးတိုးတက်မှုအခြေအနေများကိုပါ နှောင့်နှေးကြန့်ကြာ စေနိုင်ပါသည်။ အစားအစာဘေးကင်းလုံခြုံရေးသည်  ကမ္ဘာလုံးဆိုင်ရာ ပြဿနာတစ်ခုဖြစ်ပြီး တစ်ကမ္ဘာလုံးရှိ လူဉီးရေသည်လည်း တစ်ရှိန်ထိုး တိုးမြင့်နေသည့်အတွက် ယခင်ကထက် ပိုမိုအရေးတကြီးဆောင်ရွက်ရန် လိုအပ်လာပါသည်။

အစားအစာဘေးကင်းရေးဆိုသည်မှာ စိုက်ပျိုးခြင်း၊ ကုန်ကြမ်းပြင်ဆင်ခြင်း၊ ကုန်ကြမ်းလက်ခံခြင်း၊အစားအသောက် ပြင်ဆင်ခြင်း၊ စီမံဆောင်ရွက်ခြင်း၊ သိုလှောင်ခြင်း၊  ဖြန့်ဖြူးခြင်း နှင့် စားသုံးခြင်း (Farm to Fork) လုပ်ငန်းစဉ် တစ်လျှောက်လုံးတွင် ကျင့်သုံးသည့် သန့်ရှင်းမှုနှင့်ညီညွတ်သော အစားအစာကိုင်တွယ်ခြင်း၊ ထုတ်လုပ်ခြင်းလုပ်ငန်းစဉ်များကို ရည်ညွှန်းပါသည်။ စားနပ်ရိက္ခာထောက်ပံ့ရေးကွင်းဆက် (ပုံ၁) ၏ အဖွဲ့ဝင်အားလုံးသည် အစားအစာဘေးကင်းမှုကို ထိန်းသိမ်းရာတွင် အရေးပါသောအခန်းကဏ္ဍမှပါဝင်ပါသည်။ သင်သည် အစားအသောက်ရောင်းချသူ၊ အစားအသောက်လုပ်ငန်းပိုင်ရှင်၊ ထုတ်လုပ်သူ သို့မဟုတ် စားသုံးသူ ဖြစ်ပါစေ၊ သင့်တွင် အစားအသောက်ဘေးကင်းရေးအတွက် လုပ်ဆောင်ရမည့် အရေးပါသောအစိတ်အပိုင်းတစ်ခုရှိပါသည်။ ထို့ကြောင့် “Food safety is everyone’s business” ဆိုသည့်အတိုင်း အစားအစာ ဘေးကင်းလုံခြုံမှုသည် လူတိုင်းပါ၀င်ဆောင်ရွက်ရမည့် တာဝန်ဝတ္တရား တစ်ရပ်ဖြစ်ပါသည်။

ပုံ- စားနပ်ရိက္ခာထောက်ပံ့ရေးကွင်းဆက် 

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။